முகப்புக்கூடம் என்பது அருங்காட்சியகத்தின் நுழைவாயிலாகும். இது அருங்காட்சியகத்தின் அமைப்புமுறை, குறிக்கோள்கள் என்பவற்றை வழங்குவதோடு ஒரு அருங்காட்சியகத்துக்கே உரித்தான இதமான சூழலையும் நல்லுணர்வுகளையும் பார்வையாளர்களிடத்தே கடத்துவதாக அமையப்பெற்றுள்ளது.

ஏறக்குறைய 55 பேர் அமரக்கூடிய வசதியைக்கொண்டுள்ள இக்காட்சிக்கூடம் இங்கு வருகை தரும் பள்ளிக் குழந்தைகளுக்கு எமது நாட்டின் வணிக நடவடிக்கைகளின் வரலாறு உள்ளிட்ட அருங்காட்சியகம் தொடர்பான பல விடயங்களைக் காணொலிக் காட்சிகளாகக் காண்பிக்கின்றது.

இது நாணயக் குற்றிகள் மற்றும் தாள்கள், இலங்கை வங்கி, நவீன வங்கியியல் என்ற மூன்று பிரிவுகளைக் கொண்டுள்ளது. மேலும், வளைவான சுவரூடே அமையப்பெற்றுள்ள இப்பகுதி தகவல்களின் காலவரிசையையும் அவற்றுக்கான விளக்கங்களையும் கொண்டிருப்பதோடு இருண்ட அறை ஒன்றையும் கொண்டுள்ளது.

இங்கு முற்கால நாணயக் குற்றிகளும் தாள்களும் காட்சிப்படுத்தப்பட்டுள்ளதோடு இப்பகுதி பினவரும் உட்பிரிவுகளையும் கொண்டுள்ளது.

• புராதன காலம் (முற்காலம் தொடக்கம் கி.பி. 700 வரையான காலப்பகுதி)
• மத்திய காலம் (கி.பி. 700 - 1500)
• கொலனித்துவக் காலம் (கி.பி. 1500 -1950) 
• நவீன காலம் (1950 தொடக்கம் இன்று வரை)

பயன்பாட்டில் இருந்த முத்திரை நாணயங்கள், அக்குரகொட சேகரிப்பு நாணயங்கள், மன்னர்களின் பெயர்களைக் கொண்ட தங்க "ரன் கஹவனு" நாணயங்கள், போர்ச்சுகல், ஒல்லாந்து மற்றும் பிரிட்டன் ஆகிய மூன்று ஐரோப்பிய சக்திகளின் நாணயங்கள், கம்பனிகளால் வழங்கப்பட்ட கோப்பி டோக்கன்கள் மற்றும் நாணயத் தாள்கள் முதலானவற்றின் காட்சிப்படுத்தல்கள் பாரவையாளர்களின் கவனத்தை ஈர்ப்பவையாகக் காணப்படுகின்றன. பார்வையாளர்கள் நாணயக் குற்றிகள் மற்றும் தாள்களைப் பற்றிய விரிவான தகவல்களை அறிந்துகொள்ளும் வகையில் ஒவ்வொரு உட்பிரிவிலும் தொடுதிரை ஒன்று காணப்படுகிறது.

நாட்டு மக்களின் நிதிசார் தேவைகளுக்கான பதிலாக இலங்கை வங்கி உருவாக்கப்படுவதற்கு வழிவகுத்த வரலாற்றுச் சம்பவங்களும் அன்றுதொடக்கம் இன்றுவரை இலங்கை வங்கி கடந்துவந்த இந்நீண்ட நெடிய பயணத்தையும் விவரிப்பதாக இப்பகுதி அமைந்துள்ளது. 

பெருந்தோட்ட மற்றும் ஏற்றுமதி நடவடிக்கைகளின் பொருட்டு பிரித்தானிய, ஐரோப்பிய வங்கிகள் கிளைகளை நிறுவப்பட்டமை, தோட்டப் பொருளாதாரத்தில் பங்கேற்பதில் இலங்கைச் சுதேசிகள் எதிர்கொண்ட பிரச்சினைகள், புகழ்பெற்ற இந்திய பார்சி வங்கியாளர் சேர் சொராப்ஜி போச்கனாவல தலைமையிலான இலங்கை வங்கி ஆணைக்குழு உருவாக்கப்பட்டமை,1939 இல் இலங்கை வங்கியின் உதயம் என்பவற்றை இக்கதைகள் விவரிக்கின்றன.

மையில் தொட்டு எழுதும் பேனாக்கள் மற்றும் "G" முனைப் பேனாக்கள் என்பவற்றைக் கொண்டு எழுதப்பட்ட பேரேடுகள், கணக்கீட்டு இயந்திரங்கள், இலத்திரனியற் கணிப்பான்கள் முதலான வங்கிகளில் முற்காலத்தில் பயன்படுத்தப்பட்ட சில உபகரணங்களும் புத்தகங்களும் இங்கு காட்சிக்கு வைக்கப்பட்டுள்ளன. இவைதவிர நாட்டின் முதற் பிரதமரினதும் அவருக்குப் பின் பதவியேற்றவரினதும் கையொப்பங்கள் அடங்கிய சில ஆவணங்கள், புதிதாக உருவாக்கப்பட்ட இலங்கை வங்கியில் பிரஜை ஒருவர் பங்குகளைப் பெறுவதற்கு விண்ணப்பித்த ஆவணங்களின் தொகுப்பு முதலான சில வரலாற்று ஆவணங்களும் காட்சிக்கு வைக்கப்பட்டுள்ளன. 

இந்த பிரிவின் வடிவமைப்பு வேலைகள் இன்னும் நடந்து கொண்டிருப்பதோடு இப்பகுதியில் பார்வையாளர்களுக்கு (பாடசாலை மாணவர்கள்) நவீன வங்கியியல் அனுபவத்தை வழங்க எதிர்பார்க்கப்படுகிறது.

இலங்கை வங்கியின் தலைமை அலுவலக கட்டடமானது ஒரு வட்டமான தரைப்பகுதியைக் கொண்டுள்ளது. அந்த வகையில் அருங்காட்சியகப் பிரிவின் உட்புறத்தில் உள்ள வளைந்த சுவர் மூன்று முக்கிய காட்சிப்படுத்தற் பிரிவுகளை இணைக்கப் பயன்படுகிறது. இதன் கீழ்ப்பகுதியில் உள்நாட்டிலும் உலகளாவிய ரீதியிலும் நிகழ்ந்த முக்கிய வங்கித்துறை நிகழ்வுகள் காலவரிசையாக குறிப்பிடப்பட்டுள்ளன. இது பார்வையாளர்களுக்கு வங்கித்துறை பற்றிய வரலாற்றுக் கண்ணோட்டத்தை வழங்குவதாக அமைந்துள்ளது.

அருங்காட்சியகத்தில் காட்சிப்படுத்தப்பட்டுள்ள முக்கிய விடயங்களுக்கான விரிவான விளக்கங்களையும் இச்சுவர் தாங்கிநிற்கிறது. மேலும் இச்சுவர் வணிகத் துறையின் வளர்ச்சி, பணத்தின் தோற்றம் பற்றிய சுருக்கமான விவரணத்தையும் தொல்பொருள் அகழ்வாராய்ச்சியின் மாதிரித் தகவல்கள், "பொற்காசுகளிற்" காணப்படும் பல்வேறு குறியீடுகள், பொலனறுவைக் கால நாணயங்களில் உள்ள எழுத்துகளின் விளக்கங்கள் போன்ற சுவாரஸ்யமான தகவல்களையும் தருகிறது. ‘இலங்கை வங்கி’ எனும் பிரிவு 1925இல் செட்டியார்களின் வணிகத்தில் ஏற்பட்ட நெருக்கடி, 1929 ஆம் ஆண்டின் அமெரிக்கப் பங்குச் சந்தை வீழ்ச்சி, "பொருளாதாரப் பெருமந்தம்" என அழைக்கப்படும் உலகப் பொருளாதார வீழ்ச்சிக் காலகட்டத்தையும் விவரிக்கிறது.

இது சாதாரண விளக்குகளாலும் புற ஊதா (UV) விளக்குகளாலும் அமைக்கப்பட்ட ஜன்னல்கள் இல்லாத அறையாகும். ஆகவே புற ஊதாக் கதிர்களின் வெளிச்சத்தில் மட்டுமே தெரியும் நவீன நாணயத் தாள்களின் சிறப்புப் பாதுகாப்பு அம்சங்களை பார்வையாளர்கள் இங்கு பார்க்க முடியும்.

அருங்காட்சியகம் அமைந்துள்ள 28வது மாடிக் கட்டடத்தைச் சுற்றி அமைந்துள்ள திறந்த வெளி மாடத்திலிருந்து பார்வையாளர்கள் கொழும்பு நகரை 360° பாகை கோணத்தில் பார்த்து இரசிக்க முடியும்.